تلفوني كــــــــــــــــــــم

تلفوني كم ياحلوة ***ياست الفهم
عربية ترقش زي قزاز***وماما تأمر في الخدم
وبابا في دول الخليج ***رسل مصاريف بالرزم
تفاح مرسل بالسريع ***ونحن مالاقينو شم
ونحن لسة في الجروف ***وسط الحميلات والبهم
مازلنا نحرث في البحر ***مازلنا نزع في الوهم
ذي ما أنتو بتمشوا هناك ***لباريس ومرات لندن
ومرة أديس تركبوا ***طائرة مع الاوتوبيس
تأكلو نواشف ومرة ***هريــــــــــــــــــــــــس
نحن أكلنا بالفطفيط ***والتحنيس وإلا يقولو بله عريس
عاد الليلة مايوم عيدنا ***يومك جاك ياإدريس
تلفوني ياالحلوة البرية ***زيرو زيرو تلتمية
أصلو حياتنا زيرو ***زيرو هامشيـــــــة
نحن ماتابعين لسوداتل ***بالعملة المحلية
نحن تابعين لسودا ***شط العالمية
ثلاثة شهور مانشوف ***طيارة تونسية
محلقة في السموات العلية***سيبك من ركوبة يابنية
بابا غفير no no***مفتش في المشاريع الزراعية
ثلاثة شهور ماصرف ***بدل المرض او حتي ماهية
ماما نزلت معاش ***لظــــــــــروف عائليـــــــة
أصلو نازلة معاش ***مما هي صبية
أخوي تخصص باطنية ***في مجانين التكية
أختي الكبيرة صيدلية ***في الغنيمات الشوية
جدو مهندس في الرواكيب ***قولي ماشاء الله يابنية
بابا عندو الهاتف السيار خاتيهو ***في نص الخرج حق الحمار
اقصد كدنكة لحش الخدار ***وبدل الكندشة عرقاًإهتف في العدار
وماما قاعدة في تكل دوكة ***مولعة ليل نهار
وحلة فاقدة كل شي ***حتى الشمار
سافروا أنتو وختوا الرحال *** في كل مطار
ونحن خلونا في بلد ***نسامو نار
وأحكي لماما الظريفة ***كل أسباب الودار
أحكي ليها عن مطاميرنا *** اللِجفت وكل أنواع الدمار
حتي ويكتنا البسيطة ذي ***حمار جدي اللعار
وتسألي ياحلوة تلفوني كم ***من غير إعتزار
تلفوني زيرو زيرو ***وتاني زيرو زيرو
وحياتي زيرو *** علي اليسار

لك منى تحية بقامة هذا الوطن الذى انجب لنا سراجا سمانيا انار لنا ظلمات الدروب المظلمة
لك منى الاف التحايا والسلام يا رجلا افنى زهرة شبابه لتنشئة اجيال معلما ومربيا ونحن نحفظ لك هذا بل كل من نهل من معينك حقيقة انا اكتب وكلى حذر اخشية ان لا اقع فى اى خرثاء التى نظمتها فى والدنا المرحوم الحاج عبدالمحمود وكل من كتبت عنه وربنا يوفقك واتمنى ان اكون كما اريد وكطأ تعبيرى ان جاز ذلك كيف لا وانا اكتب الى استاذ تشربنا من حبه ولى طلب استاذى الجليل اكتب لنا قصائد الفى