قصيده للشاعر/ التجانى حاج موسى

جواب للبلد

ضل الضحى الرامى وشمس شتويه دفايه
وريحة البن لما يفوح فى قلايه
وفروة جدى صورة جدى لمن جيت أمد يدى :
( جدى أدينى تعريفه )
( بتقرا الحمدو يا المبروك )
( بقراها شان تعريفه ألقاها )
بجود فى القرايه كمان
وايه يا يمه والله زمان!!
وسبحة ( بنت الفكى )
والطورية والواسوق
وسعف حبوبة والكوريه والحنقوق
وصوت ( سعدية ) بت جيرانا
تشحد ليها فى طايوق
وصوت ( عرفه ) لما تخمج الدلوكه غنايه
وحبة فريك لموه لى رمضان
مصرور فى مخلايه
صور محفورة جوايا ومن يوم داك
ولى الليلة ولى بكرة وبعد باكر
شان الزمن غدار وما معروف
زمن مكار .. زمانا كلو خوف فى خوف
وايه يا يمه والله زمان
مشتاق يمه لى ملاح النعيميه
وريحة صاجك المحروق ولما تسوى طعمية
وغباشة روب وعنزه حلوب
بدور ارجع اجيكى هناك ضاقت بيه يا يمه هنا
بدور لتمسى بعيونك واصابحك يا حبيبتى انا
صباح الخير على عيونك
اتارى الدنيا من دونك شينة ومره ما بتندار
ومرة مرارة يا يمه دي مرة وحارى زى النار
ولو بتدورى احكيلك كيف احوالى فى البندر
من وين عايزه ابدالك مو شيتا غريب وعجيب
ده شيتا كلو شين فى شين
هنا الزول العديل ونصيح وحاتك انت يا غاليه
بعيش حياتو يوماتى بى وشين
وزولتى الحتى حبيتها لقيتها براى تحب زولين
وايه يا يمه والله زمان
دي قشة عينى من النوم معاى بشيل هموم باكر
قبل ما اشيل هموم اليوم اختها خطواتى الأولى
اعدى الباب تدق طبول الهم
خواطر تذهل الألباب واقابلك يا شوارع الجن
وفى جوايا حاجة تئن اشد وتر الحزن واعزف
تموت غنواتى يا يمه ويخنقنى الغنا وأنزف
وتنتر فى العروق حمى خيال بيتنا القديم يرجف
صور تنزاح وتتلم وتانى وتالت آيمه
واشوفك بى خيال حالم تشاورى وترقص السبحة
ملامح العابد الصايم تشع فوق جبهتك سمحة
وشييك يحاكى ضى النور مزدان يمه فى الطرحه
وتبسمي لى أمد ايدى اقول اتلاقى يا السمحة
يتلاشى الحلم واصحى ويدفق عرق مالح
ويسكن فينى كل الهم واشم ريحة ندم جارح
وارفس عصفورة منجرحه فارقت الفضاء البارح
وتانى وتالت آيمه وهم كل المداين وهم
وهم غرقانه فى زخم الحضاره الغم
حضارة بتحصد الإنسان وتزرع فى مكانه نغم
وقصد القول .. يا شايل اللوم ويما جابنى للبندر
وحاتك انتى يا الغالية ده يوماً شوم
ولا بسنى الخجل من راسى لى كرعى
شايلو وأحوم وهادي الحالة فى الخرتوم
زي عايش شقى ومهموم .

شكرا لك سارة على اختيارك لهذة القصيدة الرائعة
فالتجانى الحاج موسى شاعر مرهف الاحساس ولايحتاج لنعريف وله كثير من الشعر الغنائى ولعل
.. ومن اجمل ماكتب قصيدة
طيور السلام

طيور السلام قد نادى المنادي فعم البشر أرجاء البلاد
فغني لحنك الصداح غني يردد رجعه خفق الفؤاد

وغني يا طيور السلام غني لأرض فجرت خيراً وفيرا
كنوزاً مترعات بالعطايا نقي جنانها ثمراً نضيرا
وتسقيها روافد من مياه وتهطل سحبها عذباَ نميرا
وذاك النيل بالخيرات يحنو ويغدق من مكارمه الكثيرا

وتلك سفينة السودان سارت ترتد المجد في البحر الخضم
وتمضي أينما حلت حثيثاً تروم مرافئ العز الأثيم
وتضع للحياة غداً جديداً ملامحه تجسد كل حلم
قوام عطائها ألق مضيئ محي ظلمات ليل مدلهم

طيور السلام فلتمضي جنوباً محملة بحبي للكرام
وطوفي عبر دار الغرب طوفي وعودي بالمحبة والوئام
ورفي فوق أرض الشرق رفي بأجنحة تصفق للسلام
هناك شمالنا يلقاك حباً تمازجه البشاشة في الكلام

وعن أنسابنا أنبيك أمراً أفارقة تمازجهم عروبة
وعن أحسابنا أهديك عقداً نضيراً من هدندوة ونوبة
ودينكا ثم برقو تم داجو تؤكد مجد سنار وسوبه
ونعلم من كتاب الله علماً يحيل حياة أمتنا عذوبة

شكرا ليك ياعمر محمد على المرور

» قصيده بعنوا :-هوأك-:
» قصيده بعنوان نصيحه لي قلبى
» المسدار للشاعر احمد عبدالله الشيخ
» قصيدة ( هوى يا وليد ) للشاعر الدكتور محمد ود بادى العكدابى
» سأل صبي موسى عليه السلام