منتديات طابت الشيخ السماني
زائرنا الكريم مرحبآ بك في منتديات طابت الشيخ السماني يشرفنا أن تنال عضويتنا أذا كنت غير مسجل لدينا ويسرنا ان تتصفح وتستمتع بمحتويات منتدانا ضيفآ عزيزا اذا كنت لاترغب بالتسجيل

منتديات طابت الشيخ السماني

طابت الشيخ السماني تحتضن الجميع
 
الرئيسيةالبوابةاليوميةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 بمناسبة غلا الاسعار

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
بهاء الدين الناجي
مشرف عام المنتديات
مشرف عام المنتديات
avatar

عدد المساهمات : 85
نقاط : 187
تاريخ التسجيل : 07/09/2011
العمر : 31
الموقع : سنار /طابت الشيخ السماني

مُساهمةموضوع: بمناسبة غلا الاسعار   الخميس سبتمبر 15, 2011 11:56 pm

النبي فيك تقول رايك !!!

كل سنة وانتو طيبين يا ناس .. وانشالله السنة دي والجاية تكون سنة خير علينا و عليكم و على بلدنا ...علينا و عليكم دي هينة ... لكن الكلام على بلدنا .. لأني ما شايف أي بوادر خير لا من الناحية السياسية ولا الأجتماعية ... السياسية دي ما شغلتي .. و ما بحب اتكلم فيها كتير عشان ما اجيب لروحي الهوا .. مع انو والله اليومين ديل أي حبة هوا ضرورية عشان الكتمة و السخانة الشديدة دي ...
انا داير اتكلم على الناحية الأجتماعية البتهمنا كلنا ... وخصوصا موضوع المم .. المم يعني العضة .. والعضة يعني لحمة و طماطم و جداد و عيش و الذي منو ...
حقيقة السودان اليومين ديل بيمر بحمى تفوق حمى الملاريا سخانة ... والي هي حمى الأسعار ... الطماطم الي هو الطماطم بقت في ناس بتعتبرو رفاهية ... الا الطماطم مقدرور عليهو .. في ناس فعلا بتستغنى عنو و بتلقى بدايل ليهو ... لكن اللحمة .... احنا في السودان اللحمة دي في ناس بيفطروا بيها ... اها حنقدر نخلي اللحمة ..قبل أيام كانت المذيعة الجميلة نسرين سوركتي " جميلة شكلا و ضعيفة اداءا " بتتكلم في موضوع اللحمة ده .. وكانت معاها ضيفة من جمعية حماية المستهلك بتقول لينا قاطعوا اللحمة لمدة 3 يوم عشان سعرا ينزل .. حقيقة انا شخصيا كنت متوقع من الجمعية حل افضل من كده .. او كنت متصور انها تقدر تقوم بعمل اكبر من كده .. الجمعية في حد ذاتا ما قادرة تصل لحل جذري ... و المزعلني انو مافي سبب منطقي للزيادة دي .. الفهمتو من الموضوع انو أي زيادة اتحددت من قبل الجزار نفسو ... يعني بيعتمد على مزاجو بس .... و الباقيين بيقلدوهو طبعا ......
البيضايق اكتر انو امس القريب ده في الجزارة جا واحد راكب ليهو برادو .. قال للجزار نزل لي 2 كيلو لحمة ... 3 مفروم ... 5 كيلو ما بعرفو شنو ... الراجل دفع 750 و مرق ....... حتى انا قلته في نفسي لو اشترى ليهو خروفين والله كان احسن ليهو ..... وغيرو جو شالوا 3 و اربعة ... باقي ليكم ديل بيقاطعوا اللحمة ؟؟؟؟؟؟؟؟؟
ياخ امواج الواحد ده .. مطعم امواج للما بيعرفوا مطعم كبير في شارع المطار و فيهو اكل لذيذ جدا .. ياخي امواج ده مرات تفتش محل فيهو بالفتاشة ما تلقى ...و كان قافل رمضان كلو و ايام العيد .. و اليوم الفتح فيهو والله الناس واقفة طوابير .. ميزة امواج كانت انو اكلو لذيذ وما غالي .. اتخيلو انو بعد فتحتو دي نص الجدادة بقت ب 35 ج بعد ما كانت ب 28 ... الغريبة النا كلها بتعلق على الزيادة لكن بتاكل برضو و المطعم بعد ده كلو ملان لامن مدفق ..
في حاجة برضو قبل اسبوعين كده قريت في الجريدة انو الخرطوم صنفت كأغلى عاصمة عربية حتن جات بعدا بيروت و بعدين ابوظبي ....هناك من يبرفه نفسه بالشيكولاتة و الأوريو و العصاير ... حاليا امتنعتو عنها لأنو لوح الشيكولاتة هنا بسعر ما انزل الله به من سلطان ... وبدل ما تقوم الشيكولاتة بدورها الأساسي وهو التخلص من الأكتئاب تلقى روحك زعلان شديد وانت بتاكلو و بتفكر في مجاعة الصومال و دموعك بعد داك تنقط و تلعن ابو يوم الشيكولاتة ذاتو ........
بعد ده كلو عندي حبة اسئلة .. هل نحن الطبقة البرجوازية بقت عندنا اكتر من الطبقات الأخرى .. هل الطبقة المتوسطة الي هم الموظفين قادرين على الكلام ده ... هل الموظف بقت ما فارقة معاعو او بقى قادر ماديا لأنو بيشتغل اكتر من شغلانة وما بيعتمد على وظيفتو بس ...؟ هل سعر اللحمة لسة في متناول الجميع .... واخر شي هل مقاطعة اللحمة حل جذري .......دي كلها اسئلة ما ضروري تجاوبوا عليها ........ لكن الضروري عندي هل من الليلة يا ناس السودان حتقاطعوا اللحمة ولا حتعملوا رايحين ؟؟؟؟وانتو يا المغتريين رايكم انو اهلنا الغبش ديل ياكلوا اللحمة ولا ياكلوا نيم احسن ؟؟؟؟؟
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
طارق السمانى
مشرف المنتدى التوثيقي
مشرف المنتدى التوثيقي


عدد المساهمات : 53
نقاط : 81
تاريخ التسجيل : 09/08/2011

مُساهمةموضوع: قصة والله وحكاية   السبت سبتمبر 17, 2011 12:05 pm

استاذ / بهاء حقيقة الواحد ما عارف يقول شنوا لكن الحال بقى صعب شدييييييييد فى السودان والواحد بقى يستحى لما يسمع بهذا الغلاء المعيشى الذى وصل الى حد لا يطاق انا اعتقد انو السودان ده فيه طبقتين لا ثالث لهما عليا ودنيا اى سفلى والغالبية من الطبق السفلى والتى هى تحت الصفر على مقياس ريختر وديل ما بهمهم الغلاء لانهم لا يتناولون الدجاج المشوى او المحمر ولا اللحوم الحمراء او البيضاء (البيضاء دى بيسمعوا بيها سمع ) وخوفى انا السمك فى النيل الجارى ورانا ده تانى اتعزز علينا ويمكن ما تلقاهوا تانى طيب الناس تاكل شنوا ؟؟؟ ياكلوا نيم برضوا حا ينتهى لكنى اعتقد افضل طريقة الناس تصوم الدهر كلوا ودى فرصة عشان نكسب حسنات كتيرة ونلقاها فى الاخرة بدل الدنيا الزى حالتنا دى حقيقة استبشرنا خيرا عندما نسمع بأرتفاع سعر الجنيه فكنا بنحول الريال ب.75 قرش والان اصبح الريال بجنيه وزيادة يعنى مصاريف البيت بقت زايدة مع الجنيه لكن الواحد بيقول الحمد لله الناس عايشة وده المهم اما نحنا المغتربين ديل اكلنا النيم زماااااااااااااان ولو فى حاجة تانية احسن نشوفا من بدرى الحمد لله الواحد اتزوج قبل ما تكون الحال زى الان والا لكان البورة فاتت مننا وتركتنا لزمن المهازل هذا ( والله يكون فى العون )
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
بمناسبة غلا الاسعار
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات طابت الشيخ السماني :: منتدى النقاشات و الأقتراحات-
انتقل الى: