منتديات طابت الشيخ السماني
زائرنا الكريم مرحبآ بك في منتديات طابت الشيخ السماني يشرفنا أن تنال عضويتنا أذا كنت غير مسجل لدينا ويسرنا ان تتصفح وتستمتع بمحتويات منتدانا ضيفآ عزيزا اذا كنت لاترغب بالتسجيل

منتديات طابت الشيخ السماني

طابت الشيخ السماني تحتضن الجميع
 
الرئيسيةالبوابةاليوميةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 المسدار للشاعر احمد عبدالله الشيخ

اذهب الى الأسفل 
كاتب الموضوعرسالة
abdelmonem izzeldin moham
عضو نشيط
عضو نشيط


عدد المساهمات : 36
نقاط : 58
تاريخ التسجيل : 17/09/2011
الموقع : الضفة الغربية لنهر الدندر

مُساهمةموضوع: المسدار للشاعر احمد عبدالله الشيخ   الإثنين سبتمبر 24, 2012 7:11 am

[المسدار
للشاعر/ احمد عبدالله الشيخ ( القلع )

نويت القومة لى بلد الشروق الغادى
فارقت المربى و دعت الأهل و اولادى
ما جافى الوطن ..ابقى السماح يا بلادى
أصلو الهجرة كان قصدى و مرامى ومرادى

بدرى مع الوكت عند طنة الأذان
مسكنا الدرب بى جيهة الخيران
ودّع لى بلد اهلى العُزاز و حُنان
النفس فى الطمع و القلب على الطفلان

بعد الوكت عند كشفة الدغشية
قطعنا الدندر و ديك دوبا لاحت ليا
كم لينا فيك يا دريبا مشية و جية
فى عز الخريف الصيفة و الشتوية

من دوبا ولى مدنى السفر بالباص
و عارف السكة لى ماهل الطرق قصاص
فكينا الظلط حنتوب وصلنا خلاص
قطعنا النيل غرب عدينا بالرفاص

ود مدنى الجميل ما لينا فيك قعاد
الليلة الزمن حاكمنا بالإبعاد
نسم النيل، شربة موية ، لقمة زاد
ترد العافية للمرضان وطال فى رقاد

قام بينا السريع العاصمة عانيها
بالدرب الطويل الفجة بدنيها
قرى الجزيرة شدر نيما و مبانيها
عيشتك غيرنا منو البعرف معانيها

بالظلط الطويل اللا حفر لا علال
وراهو النقلى جارى بيجدع الحلال
هداك شايفنو خرطومنا البسر البال
كم كم فيهو لى سكانو أحلى مجال

مر الليل واصبحت فى الخرطوم
سفراً جايي بينى وبينو فاصل يوم
فرقاً ديما من احبابى لى مقسوم
وجع النشرة و ضيق الجاهل المفطوم

زى اللحظة يا الأثنين نهارك راح
طاب لى كلو بى زورة البقولو الصاح
امسى الليل و الهراب طلق كتاح
هجع الحى قطع الحايمة و النباح

فريق الشيطة قطع الحايمة و الحوام
انا السهران افتش فى الغميض ما لام
روحى وعقلى نفسى و قلبى سوو كلام
شالو و ختو قالوا النرضى بالأقسام

من الجريف بى ليلنا قمنا سراعا
ثلاثة وكم دقيقة اللحظة ديك الساعة
لحظات الفراق اللى القلوب لواعا
الناس فى حلم نحن البنشكى اوجاعا

اتقالدنا اتواصينا متسامحين
ودعنا الجريف مسكنا الدرب رايحين
بالعربية حصلنا المطار فى الحين
نزلنا الساحة زى العسكر الفاتحين

للميزان ختينا الشنط فى الصف
عمالاً نشاط شالوها حالاً كف
ناس الوداع دماعا سايلة تهتف
مصيبة عصيبة تراهو مصيرنا هاد الرف

ودعنا القدمونا و فتنا من الصالة
بعد الإشارة والتفتيش مرقنا كمالا
أشرق يومنا نورو البيلمع لا لا
وين بمسيبنا تاريك يا الظروف جوالا

الركاب على استعداد والطيارة ترعد واقفة
تحت هاجس قفاها موطى و من قدام تليعا وشارفة
هامين بيها الناس التهوقل رافة
سريع عبوها بى كل الجهازات كافة

مشينا عليها حسب الإشارة الجاتنا
وقف ملاحا ياخد نظرة فى جوازاتنا
طلعنا السلم عجيلة بتمشى خطواتنا
دقيقة اقلو بنفوتك خلاص واطاتنا




فى الداخل جميلة و مشكلات الوانا
بديع تصميما رايعة وفيها احلى مكانة
لطيف منعش نساف نسيما الجانا
وين ما تشوف يظهرلك يوج لمعانا

تممو على التذاكر قفلو الأبواب
اعلنو للقيام ربطو الأحزمة الركاب
لحظات الإنتظار متوترة الأعصاب
من الساعة ديك يانا البقينا اغراب

الناس جالسة و مرصوصة الكراسى صفوف
قامت تسك سكيك القارح المكتوف
انطلقت بالمطار بالسرعة التصابق الشوف
هوت قايمة فــوق ....تنسف معالق الجوف

مفروشة الأرض و مرتبات اجنابا
حافظين النظام و مهذبين ركابا
ترز وتهز للسما بتتشابا
إت النجمة ولا حدية ولا سحابة

طارت بى سلام مسكت طريق الجو
متين فى الصنعة حس مكناً بيرزم جو
طلق فاح لينا نساما بفوق النو
يخضر منو عود الكربة الميبس كو

ظرافة و زوق مسئولا فهيماً ناهى
فوق فى الجو ادانا الفطور و الشاهى
تايها افكارى بقيت من نفسى غافل ساهى
إتشابيت اتوكرت سريع و الله

فوق المالح متوجه طريقنا وشاق
نحس بى خجة تشابه رجة الدقداق
رب الكون معانا القادر الخلاق
نسلم جملة نصل بالعافية ما ننعاق

يا الطيارة جنحيك السما لامساهو
تحتنا سحاب ولا مراية دى العاكساهو؟
جبال فى جبال قدرة ربنا الرصاهو
رب القدرة خالق الدنيا مين بعصاهو؟




يا القلع خلاص لى حدود الوطن فارقت
نقول دى القسمة ولا إت براك شالقت ؟
مديت النظر بالشباك تحت تاوقت
ديك جدة ظاهرة خطوط و العربية زى النقطة

كبتنا القدير أكيد فوزو كان بجدارة
شوفو كيف تالى مهوقى بالطيارة
احوم عاينالى جدة وعظيم معمارة
سبعة و نص تمام تلينا جوا مطارا

وصلنا و جينا لى بلد الرسول الغالى
طيب ذكرو بفرحنى ويفوض بالى
عذرى ليك رب القدرة يعدل حالى
امشى واجيك ليك ازور اتم آمالى

ركبنا الطايرة بعد وكتاً قليل مو كتير
ودع جدة قام بينا البحاكى الطير
خاطبنا المكرفون قالينا نحن بخير
عانيين الرياض طيارنا جادى السير

قاعدين فى الرياض مرت تلات ساعات
جلوس فى الصالة اتزودنا بى تمرات
واصلنا السفر بعد ما ودعو السادات
فى بطن السما اتوكرنا فى لحظات

الساعة خمسة طار بينا البشب عجلان
مسك الفجة قاصد جيهة الظهران
صقر الجو متين طالع عديل نيشان
وزن جنحيهو بالبو الملان دخان

مكنة سالكة يهدر حسها بيسكل
انتكت بى جناحا لاحت لوحة داير تتل
وصلنا الساحة شاقين المطار نقدل
عاد يا ربى تانى متين شهرنا بهل

يا الظهران مطارك حكمو السواهو
ابدع فيهو ..نقش الكيك رسم مبناهو
قزازو الصافى نظامو السحرى من تعناهو
مارق ..داخل إفتح ليك بابو براهو




برا وجوا زوارو الكتار اتعكلو
إخوضو يجولو بى لبساً منوع شكلو
اللابس القطرة و الفوق راسو العقال حابكلو
و الفى وشو دخان السجار عابكلو

من النيل طار بينا الحديد ابعد
وصلنا الخليج ختانا فوق الحد
من الدمام ضرب تلفونا جاب الرد
حالة الغربة يا داب بقت حقيقة و جد

وحاتك جونا شبانً نشاطاً قوة
إتفرقنا ..كل مجموعة ركبت سوا
من الظهران وبى درب المهاوى الجوه
على الدمام و داك نورا الميوقد ضوا

من الظهران على الدمام مسكنا البر
من شمال بارينا الساحل المنشر
نشب العالى و نقبض الواطى نتحدر
نوراً غادى نسأل منو نتخبر

ختمنا السفرة وصلنا العاصمة الشرقية
عروس الخليج فى ليلة زفاف مجلية
جميلة و رايعة يا نعمة المدينة الحية
دخلنا ربوعا يا الدمام سلام و تحية

وصلنا و جينا يا الدمام عليك ضيفان
اسياد عز بنبقالك اهل و اخوان
بدور تبقيلنا زى ما كنا فى السودان
تجيبى الخير علينا و ديمة تفرحى الزعلان

يا رب يا كريم يا الدارى بالمجهول
استر حالنا فى الغربة الزمانا بطول
سريع حالاً يمر الحول وراهو الحول
نرجع تانى للاوطان بعد ما نحقق المامول.



احمد عبدالله الشيخ (القلع)
المملكة العربية السعودية
فى يوم 17 ابريل 1982م
[/center]
[c[/center]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
قريب الله
مشرف المنتدي العام
مشرف المنتدي العام


عدد المساهمات : 113
نقاط : 131
تاريخ التسجيل : 04/01/2012

مُساهمةموضوع: رد: المسدار للشاعر احمد عبدالله الشيخ   الإثنين أكتوبر 01, 2012 6:59 pm

لك التحايا الاستاذ العملاق شكرا جميلا على هذه المشاركة وانا ادرى بانك مغرم بالادب والشعر العربى الفصيح والعامى ونرجوا منك التعليق على اغنية ماهو عارف قدمو المفارق وانا اعلم ان لك قصة معها ودمت
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
abdelmonem izzeldin moham
عضو نشيط
عضو نشيط


عدد المساهمات : 36
نقاط : 58
تاريخ التسجيل : 17/09/2011
الموقع : الضفة الغربية لنهر الدندر

مُساهمةموضوع: ملحق ( المسدار )   الثلاثاء أكتوبر 02, 2012 5:57 am

قصيدة المسدار للشاعر احمد عبدالله الشيخ ( القلع) و هو سليل اسرة الشيخ ود النذير الشهيرة بمنطقة شرق الدندر و مقيما بقرية ملولحة و هو زميل للأخ مبارك محمد احمد حمد فى الإرشاد الزراعى بمؤسسة السوكى الزراعية و قد لا يصدقنى احد لكنى كتبت هذه القصيد من اصل ارسله لى الأخ القلع بنفسه عام 1982م و بخط يده و كنت حينها معلما بالكرمك و لا زلت حتى هذه اللحظة محتفظا به ، ولم احصل على إذنه بالنشر على الإنترنت و أنا من منبر منتدى الشيخ السمانى أحيى الأخ الشاعر القلع تحية حارة و سلام كتير و نطلب منه الإذن بأثر رجعى و كنت قد كتبت مقدمة مع النص لكنها لم تظهر على الموقع لأسباب تقنية و فنية تعود لجهلى و الحمد لله ببعض مهارات الكمبيوتر و كما تعلمون انا زول جربندى من الجيل الذى لعب بجمال الطين وعلب الصلصة و كما هو واضح فى النص فإن الرحلة بدأت سيراً على الأقدام من قرية ملولحة مرورا ب دوبا و مدنى و عبر اربعة مطارات هى الخرطوم ، جدة ، الرياض و مطار الظهران حيث لم تنته الرحلة بعد و تواصلت بالسيارات إلى مدينة الدمام عروس الخليخ و بهذا يكون الأخ القلع قد دخل موسوعة Quenniss للارقام القياسية حيث يتفوق هذا المسدار من حيث طول الرحلة و تنوع وسائل الترحال و براعة الشاعر فى الإنتقال من بيئة الى اخرى رغم المفارقات و تحكمه فى روح المسدار كأدب قومى سودانى متفرد لكنه ليس جامدا فى قوالب البادية و الإبل بل يمكنه التأقلم مع أحدث منتجات التكنولوجيا ممثلة فى وصف الشاعر للطائرات و المطارات محتفظا فى نفس الوقت بالروى المتوارث لفن المسادير شكلاً و مضمونا مرة أخرى احيى أخى القلع و أحييكم جميعاً عشاق الكلمة و أحيى جميع أعضا ء المنتدى ........... وللحديث بقية إن كان بالعمر باقٍ .
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
احمد عبدالله الشيخ
عضو مبتدئ
عضو مبتدئ


عدد المساهمات : 2
نقاط : 4
تاريخ التسجيل : 17/05/2013

مُساهمةموضوع: رد: المسدار للشاعر احمد عبدالله الشيخ   الجمعة مايو 17, 2013 9:01 pm

سلام منعم سلامي عليك
تحية تشمل الحواليك
اهلك جملة الاحباب
ناس الحلة البعيد والجار
كل الشلة بلغهم سلامي الحار
.....
سلام طابت سلامي عليك
على البقعة ومسيد الشيخ
خلاوي الضيف
ساحة الذكر والقران
درويشا محبة بصيح
تنم اصوات نشيد ومديح
سلام يا قبة السمان
.....
شاطي النيل وقيف
بتلامسو الموجات
تذوب مرتاحة عند البر
على حد الرمال والطين
تقول همسات
تهش افراح معاهو وتر
ينقرش يعزف الانغام
جناح ينفر
يرفرف في فضا الامال
ريد وحنين
عشان تتحق الاحلام
.....
ليقت روحي تحلق فوق
عليكم راحلة شايلة الشوق
بـي جنحين
ريش من غنا القمري
وحنين النوب
.....
معاي الشوق ليل ونهار
دايما ساكن الوجدان
بجسد للوطن تذكار
مسيهو وسادة عند النوم
في الصحيان بشيلو هموم
.....
كتير مشتاق شوق حار
احس بلهفة العشاق
مناي ارحل اعيش الليل
هناك في الدار
اعيش الليل طراوة جميل
بين اصحابي والاخوان
جمالو النحنا عارفنو
بنهواهو بنعشق فنو
رزة نوبة دقة طار
حس جرقاس حرس سهران
بينبح هو
ولمبة هناك بتلمع ضو
نسمة تداعب الاغصان
معاها بجيك صوت فنان
ندى ونشوان
يناجي الليل
.....
ليلاكلو ثاني سكون
ناسو مسافره برا الكون
سلام الاف سلام مليون
يفوق العد يفوت الحد
عليك يا خونا ود حمد
يا منعم مبارك وين
مكانو وين من التجوال
مني ليهو ودي عتاب
كمان قوليهو
لا سألت مني الناس
ولا رسلت لي خطاب
ولا حتى رنة من جوال
سنين وسنين طواها الغيب
لو لاقيتي ما بتعرفني
من فعل الزمن والشيب
شوف اعمارنا .راحت كيف
امس والليلة زي بكره
تقول برق ام رويق الشال
وتبقة في الخيال ذكرى
وين اعمارنا .راحت كيف
سريع مرت سحابه صيف
.....
سلام لي حاجزي في الخرطوم
وكان شندي
في الديانة ود الجاك
شعر بديهو من عندي
ود السيد الازرق طويل البال
ناس وددونسه والمشروع
غاب مني الخبر مقطوع
لا عارفني حيا عايش
ليهو قوت وارزاق
ولا عارف خبركم وين
قديم قالو الزمن فراق
.....
وحاتكم انتو يا الطيبين
كم قاسيت وكم عانيت
على حالي وبقيت موجوع
اغالب احزاني في غربة
احلم بالرجوع في النوم
احس بالحسرة في جواي
لما اقوم
من النيل بدور شربه
تروي ظماي وتطفي عناي
.....
بقيت بي حالي ما راضي وبتذكر
اقلب صفحة الماضي وبتذكر
وبتذكر عشا التفتيش
نسوي الفتة من ما فيش
صحن الفول جبنة وعيش
قطرة زيت عليها نبيت
من الفكة خالي الجيب
يوم باكر صباح وقريب
بنرجا اللنكتب في الغيب
ومهما يكون وين ما يكون
بنحمد ربنا ونشكر
برغم الحال قساوة ومُر
......
كان في البال اسافر لي بلاد برا
اجيب المال رزم كيمان
بعد ازمان عرفت كمان
شينا فيهو ليك مسرة
وزينا تلقى منو مضرة
.....
شفت كتير عرفت كتير
غنيا شقي وتعبان
معذب في الحياة محروم
فقير محتاج غناهوا بالقناعة بدوم
عرفت كتير وشفت كتير
كلام الصمت حديث العين
رموش بتفسر المكتوم
لحاظ بترجم الممنوع
....
حليل بلدي زينت الدنيا
سماهو مطير رعدو يكر
دوداين بيعزف غنية
عفرت شا ل
فوق الباجة ميح مال
لوحة بديعة ضلو يخر
يقلب في مراقد السيل
ملا الوديان والخيران
شال الموية عانية النيل
.....
بريد وطني وين الزيو
ما لاقاني ليهو مثيل
شبيها ليهو مافي محال
زي اهلو البزيلو الهم
بيعفو الدم اكارم ديل
بيعزمو الضيف على الديوان
طلاق حرم
.....
لما يكون نهارنا خريف
ملبد بالسحاب هضليم
فوق روسينا خيم غيم
بيهو الشمس بتلفحة
سماحة القعدة في يوم داك
صباحنا ضحى
في ضلا تخين مو رهيف
تحت النيمه وسط حوشا وسيع ونظيف
على بنبر و هبابا وسارن
من حبال الليف
شرافة لوح جميله خلاص
وبين الناس
ود ومحبة الفة متينة ما بتنقاس
.....
حلاته رشفه الشاهي المنعنع حار
بعدو تجينا قهوة بن تتم الكيف
وفي الجلسة بنقول مسدار
على بلدي علي اهلي
مهما اقول وفيهو افيض غنا ودوبيت
القى كلامي منو بعيد
مقصر حقو ما وفيت
.....
عبدالمنعم ود عز الدين
انا ليك مدين
بالتقدير والاحترام
واذني معاك وشكري جزيل للاهتمام
وفي الختام سلام وسلام


احمد عبدالله الشيخ (القلع)
المملكة العربية السعودية
0501277915


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
المسدار للشاعر احمد عبدالله الشيخ
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات طابت الشيخ السماني :: منتدي الأدب والشعر-
انتقل الى: